miércoles, 29 de febrero de 2012

Ahozkotasun ereduak: itzulpenak



Ahozkotasun ereduak: itzulpenak




Fuga de cerebros (2009) pelikularen kasuan egokitasuna gailenduko nuke jatortasuna eta zuzentasunaren gainetik. Gazteei zuzendutako umorezko filma dugu. Gazteen arteko umorea, hizkera eta esamoldeak erakusten dira.  Beraz, euskaraz itzultzerakoan eredu normalizatzaile kuantitatiboa erabili beharko litzateke. Hau da, gaur egun edozein gazte koadrilak beraien artean erabiltzen duten hizkera. Baina filmean zehar, hizkuntza edo kultura maila ezberdinak dituzten pertsonaiak agertzen dira. Ondorioz, euskara, pertsonaia bakoitzaren hizkera motara egokituko nuke. Alegia, gaztelerazko bertsioan erabilitako hizkuntza erregistroak mantenduko nituzke, eredu estandarra eta jatorra tartekatuz.



Torrente, el brazo tonto de la ley (1998) testu hau euskaratzerakoan, eredu normalizatzaile kualitatiboa erabiliko nuke, jatortasunean oinarrituz. Izan ere, aurreko filmarekin alderatuz, hizkera zatarragoa antzematen da. Politikoki egokiak ez diren esamolde eta adierazpenak. Umorezko film honetan hizkuntza kolokiala eta argota erabiltzen dute pertsonaia ezberdinek. Beraz, ikus daitekeen pasartea euskara jatorrean itzuli dut, zuzentasun gramatikal zein akademikoa baztertuz. Zenbait esapide euskalkiak edota gazteleratik hartu ditut. Beti ere, gazteen arteko hizkera eta freskotasuna ez galtzearren. Izan ere, Torrenteren hizkera zakarra da, misoginoa… eta ezaugarri horiek erabiltzen ez baditugu filmak bere xarma galduko luke. Alegia, kalean gazteek erabili dezakegun euskara erregistrora hurbiltzen saiatu naiz.
Ondorengo bideoan euskarazko itzulpena ikus dezakegu:

sábado, 28 de enero de 2012

Aupa Pipol transmedia saioa

EHUko Multimedia Komunikazio masterreko ikasleoi, transmedia proiektu bat diseinatzea eskatu ziguten orain dela bi hilabete. Hirunako hainbat taldek lan egin dute kontzeptu horren inguruan, eta bakoitzak emaitza ezberdinak lortu ditu. Guri, mikro-fikzio bat proposatzea egokitu zitzaigun: Aupa Pipol. Proiektu guztiak EITBren Bilboko egoitzan aurkeztuko dira urtarrilaren 31an, guk kapitulu pilotu bat sortzea erabaki genuen .

Frantziar estatuan asko garatzen ari dira horrelako mikro-saioak, bai telebistan eta bai interneten. Pertsonaia gazte bat, 20 eta 35 urte-tartekoa, bere eguneroko berri ematen duena 2-3 minutuko saioetan. Plano erritmotsuak, musika indartsu bat eta aurrera. Interneteko oso egokiak dira formatu hauek eta ekoizten aski merkeak. Hainbat adibide arrakastatsu aipa daitezke, hauen artean: Bref CANAL + katean, eta Norman interneten.



Antzeko formatu laburrak gogoan edukiz, horrelako mikro-fikzio bat egitea erabaki genuen. Pertsonaia nagusia Gorka deitu genuen: 26 bat urteko bilbotarra, gaur egungo gizarte post-modernoan apur bat galduta dabilena. Gorkak bere eguneroko gogoeta zein anekdota intimoak kontatzen ditu Tumblr batean. Bideoan agertzen diren irudi eta off-ahotsek ordea bere barnekotasuna irudikatzen dute.

Transmedia izanez gero, hainbat euskarritan biziko den unibertsoa sortu nahi izan dugu, eta gure asmoak Aupa Pipol beste euskarritan garatzea aurreikusten du: irratia, sare sozialak, paperezko egunkaria...

Dena den, gure pertsonaia aurkezteko bideo bat egin dugu! Eta Facebook eta Twitterren ere jarrai ditzakezu Gorka eta Aupa Pipol!



BIDEOA IKUSI ETA ZABALDU SARE SOZIALETAN!


martes, 10 de enero de 2012

Non da Maddi???

Neguko solztizio eguna dugu gaurkoa. Zugarramurdiko jaiak dira eta Maddi etxean dago festara joateko prestatzen. Lagunek, bere bila joango direla esan diote eta itxaroten dagoen bitarte horretan zeozer aurkitzen du etxeko ganbara ilunean....

Entzun ezazue multimedia masterreko irrati ediziorako egin dugun istorio honen soinu paisaia.

Zer gertatu zaio Maddiri?

Zuon laguntza behar dugu istorioaren amaiera kontatzeko...mesedez, parte hartu eta utzi zuen erantzuna post honen iruzkinen atalean.

ESKERRIK ASKO!




domingo, 8 de enero de 2012

3, 2, 1... sortu!!!


Sarritan gure irudimena aske utzi eta zerbait sortzeko asmoz jaikitzen gara ohetik. Beste batzuetan ordea, ez dugu aukerarik, agintzen digutena bete beharra, besterik ez. Baina, burmuinak martxan jarri eta irudimenarekin jolastea osasungarria izateaz gain, beharrezkoa dela ere esan daiteke.

Ideia, proiektu…bat garatzen hasi aurretik, sormen prozesu honetan zenbait erabaki hartu beharko ditugu. Adibidez, ikus-entzunezkoen alorrean, erreportaje bat ekoiztu nahi izanez gero, zenbait aspektu kontutan hartu behar dira. Lehenik eta behin, zer komunikatu nahi dugun zehaztea komeni da. Gai bat aukeratu eta beronen nondik norakoak argi zehaztu. Izan ere, jorratutako gaiaren arabera, xede-taldea ere ezberdina izango delako, gure ekoizpena aukeratutako publikoaren interesen araberakoa izan behar delako. Ondo legoke argitzea ere, xede talde bakoitzak hizkuntza maila edo hizkuntzaren erabilera ezberdinak egiten dituela.

Onuragarria izango litzateke ere, aukeratutako gaiaren inguruguko dokumentazio lan sakona egitea. Jasotako informazio guztia sailkatu, aztertu eta guzti hori erreportajean nola ilustratu erabaki ahal izateko. Normalean, ekoizpen bat burutu aurretik egindako dokumentazio lana ezinbestekoa suertatzen da erreportaje interesgarri bat egiterakoan.

Ondoren, gaia eta publikoa behin zehaztuta, gure erreportajearen generoa aukeratzeko momentua iritsi da. Genero bat edo beste aukeratzeak, egitura zehatz baten aldeko apustua egitea suposatzen du. Hau da, argi izan behar dugu gure erreportajea elkarrizketetan oinarrituko den ala ez, edo fikziozko istorio baten izango den ala ez, etab.

Aipatutako pausuak definituta, eta generoa aukeratuta, gaiaren inguruko zirriborro antzerako bat egitea gomendatzen da. Kontatuko den istorioaren story board bat. Zirriborro honek erreportajean agertuko diren elementuak, ideiak, protagonistak, osagaiak… zehazteko balio izango digu. Alegia, erreportajearen aurreikuspen bat egiteko eta ekoizpen lana errazteko. Irudi motak, proiektuaren estetika, iraupena, hizkuntza maila, off ahotsak… erabaki behar dira zirriborroan.

Aurreko elementu guztiak kontutan izanik, erreportajearen diseinuaz arduratuko gara. Gaur egun, multimedia erreportaje bat sortzea da aukerarik interesgarriena, hau da, euskarri ezberdinetako edukiak proiektu berean uztartzea (audioa, irudiak, bideoa, argazkiak, testuak…). Baina erreportajearen testua euskarri ezberdin horietara egokitu beharra dago, euskarri bakoitzak bere berezitasunak baititu. Beraz, diseinu aldetik, malgua, erraz egokitzekoa eta erakargarria izan behar du gure erreportajeak.

Eta azkenik, bukatzeko, aipatutako urrats guztiak zehaztuta, gure ideia edo erreportajeari ekingo digou. Esan bezala, ...3, 2, 1… sortu!!!

sábado, 7 de enero de 2012

Euskara ere multimedia plazan

Euskarazko multimedia hedabideen eskaintza aztertuz gero, denetariko generoak aurki ditzakegu. Hedabide bakoitzak bere ekarpena egiten dio euskarari. Esparru ezberdinetan jokatuz, eremu bakoitzak eskatzen duen hizkuntza-ereduan.
Ikusmira zabalean, estaltzen duten esparru geografikoaren arabera, nolabaiteko segmentazioa nabari da euren artean, sorburu duten edota estali nahi duten esparru geografikoaren arabera. Esaterako, Berria Euskal Herri osorako egunkaria da, Hitza eta Noaua berriz, tokikoak dira. Ondorioz, bata bestearen lehiakide ez diren heinean, osagarri bihurtzen dira eta oso interesgarriak irakurlearen begietan.

Gizarte orotan bezala, gurean ere, bakoitzak bere zaletasun zein jakin-minak ditu. Horri erantzunez, beharrezkoak dira gai eta arlo ezberdinak jorratzen dituzten hedabideak. Hau da, zientziarekin zerikusia duten gaietan adituak, gazteei zuzendutako informazioa eskaintzen dutenak (Elhuyar, Gaztezulo eta abar)

Baina hedabide konbentzionalez gain, sarean badira ere lankidetza ereduetan oinarritzen direnak (Gaur8, Zuzeu, Kazeta.info). Alegia, barruko eta kanpoko egileek sortzen dituzte edukiak; antolaketa horizontala batez esan daiteke.

Hala ere, informazio mota, beronen egituraketa, antolaketa…kontuan hartu behar diren arren, xede taldea ere oso garrantzitsua da. Eta horretarako, xede-talde horren hizkera, euskalkiak, erabiltzea erreminta oso aberasgarria da irakurlearentzat, horrela jarduten dute, besteak beste, Goienak, Bizkaiek…

Tokikotik eremu nazionaleko hedabideetara pasata, EITBk EH hartzen du xede-taldetzat, informazio orokorra eskainiz. Web gune homologatua eskaintzen du, hedabide nazional bat bezala. Bertokoek ez ezik, nazioartean Euskal Herriaren berri izateko erreminta oso interesgarritzat jo dezaketena.

Tokiko TVk eta Arrosak, ordea, osagarriak dira, bertan tokiko telebistak eta irratiak biltzen baitira. Osagarriak dira. Azken bi horiek elkar elikatzen dute, EITBk estaltzen ez dituen esparruei arreta eskainita.

Oro har, euskaraz aritzen diren hedabideen jarduna positibotzat eman dezakegu. Gizartearen esparru eta geruza ezberdinak kontuan hartzen dituzte, dena hobetu daitekeen arren. Hau da, teknologia berria hauen garaiotan, eguneraturik izan behar dute hedabideek, erabiltzaileen beharrera egokituz. Ildo horretan lan asko dago egiteke oraindik, baina orain arte emandako pausoak oso interesgarriak dira. Euskaraz kontsumitzen den heinean, erraztasunak eman behar zaizkio informazioaren erabiltzaileari.

Horrela bada, etorkizunari begira, euskal hedabideen mapa idealak informazio orokor zein espezializatua eta entretenimendua eskaini beharko lituzke. Elkarkidetza eta elkarlana funtsezkoak dira horretarako, beti ere eduki interesgarri eta kalitatezkoen ekoizpena bultzatuz. Esan bezala, ahalik eta kolore gehien behar ditu euskarak, bai edukien aldetik, bai ideologiaren aldetik, baita euskara-moldearen aldetik ere. Alabaina, tentuz eman behar dira urrats guztiak, helburuak eta baliabideak ongi doituz, eta ahaleginak ondo neurtuz. Erabiltzaile potentzialen taldea ez da handiegia, eta euskara ere ezin dugu ito igeri ezin duen ur handietan.


Euskararen kolore aniztasuna eta Sare Sozialak


Euskal Herrian elebidun kopurua gora doa, datu guztien arabera eta euskara gaztelera baino gehiago erabiltzen dutenen kopurua ere hazten doa pixkanaka-pixkanaka. Azken 20 urteotan 200.000 hiztun inguru irabazi ditu euskarak. Alabaina, hizkuntzaren erabilera ez da hein berean areagotu; euskarazko hedabideen kontsumoari begiratu besterik ez dago. Alegia, kontsumitzaile potentzialen eta errealaren arteko desberdintasuna nabaria da. Egoera horretan ez da makala euskarazko hedabideek duten erronka.

Erabiltzaile berriak berenganatzeko ezinbestean hartu beharko dituzte kontuan produktua xede-talde bakoitzari era zuzen batean egokitu ahal izateko. Baina lehenetsi beharreko kontsumitzaile taldeak gazteena eta nerabeena izan behar du horiek baitira euskararen etorkizuna, inor izatekotan. Izan ere, 50 urtetik gorako jendearen kontsumo ohiturak aldatzea zaila izan daiteke eta ez oso emankorra.

Zenbaitetan euskarazko hedabideak ildo politiko zehatz batekin erlazionatu izan dira, ideologia zehatz batekin. Ahalegin handiak egin dira prentsa idatzia euskaraz emateko, baina ahalegin horrek ez du behar bezalako babesa jaso. Hori dela eta, beste aditu batzuek hedabide guztiak lehenetsi behar direla diote, euskara oraindik nahiko errotuta ez dagoelako ez euskarri idatzietan ezta ikus-entzunezkoetan.

Beste aditu batzuen ustez ordea, internetek eta telebistak izan behar dute lehentasuna, etorkizuna hedabide horietan dagoelako, gazteek nagusiki hedabide horiek erabiltzen baitituzte. Adibidez, sare-sozialen kasuan egoera ez da oso pozgarria. Burututako ikerketen arabera, esan daiteke sare –sozialetan gazteek euskararen erabilera urria egiten dutela. Badirudi egoera informaletan gehienbat gaztelera erabiltzen dutela. Hau da, ikertutako gazteek euskara ez dute informaltasunarekin erlazionatzen, euskara hizkuntza zurruna, moldaezina iruditzen zaie. Ikerketaren emaitzen arabera, euskara era gutxituan erabiltzen dute gazteek. Izan ere, elkar zoriontzeko, eskerrak emateko, maitasun kontuak adierazteko soilik erabiltzen dute euskara sare-sozialetan.

Aipatutako egoera aldatzeko eta erabiltzaile erreal zein potentzialak erakartzeko, interneten garrantziaz ohartu behar gara. Informazio orokor zein berezitua eskaini, aniztasuna behar dugu. Kolore askotariko informazio eta hedabideak. Estilo serio eta arinak konbinatu. Eta formatuaren aldetik, multiplataforma-estrategia bultzatu eta suspertu.

Eta azkenik, bukatzeko, uste dut euskara eta beronen erabilera informala bultzatu behar dugula. Hizkuntzak biziak dira, aldakorrak. Alegia, teknologia eta aro berrietara egokitzeko prestasuna eta gaitasuna erakutsi behar du euskarak.




sábado, 31 de diciembre de 2011

ZORIONAK ETA URTE BARRI ON!!!

Urte barri barri txarri belarri; dakonak eztakonari; nik ez dakot eta niri; aginaldo, etxa kastaña, etxa intxorra; lau kastaña lau intxorra...Mari kastaña!

Señorita una! Señorita dos! Bota aginaldo por amor de Dios!
Etxa bonba! Etxa bonba! Dale, dale, dale... hasta ke se rompa!!!


URTE BARRI ON PIPOL!!!

viernes, 30 de diciembre de 2011

2011 publizitatez blai!

Urteak joan, urteak etorri. Baina publizitateak gurekin dirau. 2011 bukatzera goaz, hori dela eta urte honetako telebista iragarki atseginenak proposatzen dizkizuet, behintzat nire 3 gustokoenak.

Ea ze iruditzen… On egin!!!


Mc Donalds Vs Burger King


Bizi garen mundu lehiakor honetan, publizitateak ere ez dio ihes egiten egoera honi. Suposatzen dut, denontzat ezagunak direla marka batzuen arteko lehia gogorrak, bortitzak zenbait kasutan. Sarritan lehia horretan murgilduta, marka askok konpetentziaren aurka jotzen dutelarik zuzenean.

Badira hainbat adibide, besteak beste autoen markak burutu izan dituzten zenbait publizitate kanpaina, Audi eta BMW datorzkit burura. Baina ezin ahaztu ere, dagoeneko klasikoak bilakatu diren Coca Cola eta Pepsiren iragarki aski ezagunak.

Honako hau, Mc Donalds-ek Alemanian soilik emititutako iragarkia dugu. Non iragarleak ez duen testu ezta hitzik erabiltzen Burger King-en irudia gutxietzi edo kaltetzeko. Irudiekin nahikoa da. Bideo atsegina eta barregarria den arren, bere arriskua badauka. Eta ziurrenik, laster Burger King-en erantzuna ikusteko parada ere izango dugu.

Egia esan, espainiar estatuan ez gaude ohituak era honetako iragarkiak ikustera, baina publizitate mota hau iragarlearentzat eraginkorra al da?


miércoles, 28 de diciembre de 2011

Nikon, sexu jolasetan?

2008. urtean Nikon enpresak Nikon S60 kamara berria merkaturatu zuen. Modelo honek abantaila teknologiko ugari ekarri zituen berarekin, baina bere ezaugarria nagusia zera zen: irudi bakar batean 12 aurpegi ezberdin detektatzeko gai zela. Hori dela eta, publizitate edo iragarpen kanpaina aipatutako abantailan oinarritu zuten.


Ikus dezakegun irudia, beste 2 iragarkiz osatutako kanpainaren parte da. Esan beharra dago ere iragarki hau ez zutela espazio publikoan iragarri, ondorioz, iritzi publikoan ez zuen inongo iskanbilarik sortu. Izatez, audientziak oro har nahiko umore onez jaso zuen iragarkia, ez zuten sentzuratu. Esan bezala, publizitate kanpaina sinpatiko eta atsegin bezala onartu zuen audientziak.

Baina, beharrezkoa da, emakume bi horiek (adingabeko itxurarekin) horrelako egoera sentsualean agertzea? Balizkoa al da? Emakumea sexu-jolasekin erlazionatzea egokia ez izateaz gain, arriskutsua ere izan daiteke. Estereotipo hauetatik ihes egin beharra dago, are gehiago, irudian agertzen diren emakumeak adingabeak diruditenean. Denak ez du balio publizitatean.

Euskal armiarma trebeak sarean



Aurreko astean euskarak Interneten duen presentzia eta garrantziaz jarduteko Multimedia Komunikazio EHU-EITB Masterrak mahainguru oso interesgarria antolatu zuen. Euskarazko webguneen sorreran eta sustapenean aitzindariak diren adituak aritu ziren hizlari gisa. Euskarazko komunitate birtualez mintzatzeko 6 gonbidatu izan ziren, bata bestea zein baino trebeagoa: Luistxo Fernandez (Sustatu), Lander Arbelaitz (Argia), Hasier Etxeberria (ZuZeu), Idurre Eskisabel (Berria), Maite Goñi (Euskal Jakintza), eta Lontzo Sainz (Eitb).

Euskararen komunitate birtualaren inguruko mahai-ingurua oso aberasgarria suertatu zen bertara gerturatu ginen ikasle eta zenbait irakaslerentzat. Eztabaidan zehar iritzi ezberdinak entzuteko aukera izan genuen arren, orokorrean hizlarien artean joera edo korronte bat gailentzen zela nabari zitekeen. Alegia, Interneten, kalean zein beste toki askotan bezala, euskaraz jardun behar dugula gure nortasun digitala osatzen goazen heinean. Eta bestetik, diru laguntza publikoen beharra aldarrikatu zuten ahobetez aditu guztiek. Diru publikorik egon ezean, euskal komunitate birtualik ez dela existituko salatuz.

Euskaldunok interneten gauden heinean euskal komunitateak existitzen direla adierazi arren, Luistxo Fernandez-ek euskarak sarean merkatu komertzialik ez duela ere ziurtatu zuen. Bestalde Maite Goñik euskarazko komunitate birtualak euskaldunok hornitzeko gonbidapena luzatu zuen, erabiltzaile bakoitzak bere ekarpen txikiekin gauza handiak egin daitezkeela adieraziz. Euskaraz jarduten duen nabigatzaile bakoitzak ehuntzen du sarea, alegia, erabiltzaileongan dago ardura.

Argiako kazetariak ere, Lander Arbelaitzek, datu interesgarriak plazaratu zituen mahai-inguruan. Internet eta sare sozialei esker, euskarak gaur egun duen hizkuntza zaharkituaren zama kentzeko aukera ezin hobea duela. Izatez, harrigarria den arren, Wikipediako 6.000 hizkuntzen artean, euskara 43.postuan aurkitzen da. Hala ere, emaitza horiek eta edukiak hobetzeko asmoz, produktu erakargarriak eta kalitatezkoak ezinbestekoak dira. Arbelaitzen iritziz, militantzia alde batera utzi eta kalitatearen aldeko apustua egin beharko genuke.

Hizkuntza gutxituen kasuan, euskara eredu gisa hartuz, militantzia alde batera utzi behar ez dela uste dut. Mugak eta oztopoak etengabe jartzen dizkigutenean, militantzia beharrezkoa da, ezinbestekoa. Kalitatea eta militantzia eskuz-esku joan daitezkeelakoan nago. Sarean euskal komunitatea ehuntzeko gogoa eta borondatea badago, baina hizkuntza politika eraginkor baten beharra ere badugu.

Eta azkenik, laburbilduz, Lander Arbelaitzen adierazpen txukun honekin bukatu nahiko nuke:

Aritu, erabili eta soinua atera euskaraz!

viernes, 16 de diciembre de 2011

NEGUA

Irratirako egindako soinu-lana...

Negua, sasoi gogor eta gordina. Latza. Luze eta iluna. Hotza. Neguan, pauso hotsak, oihu latzak euri artean. Arnas gabe, babes eske. Elurra mara-mara, paisaia guztia txuriz jantziz. Haizea bortizki, barruak astinduz. Negua, bakardadea. Etxeko berotasuna ta goxotasuna, neguaren adiskide ta osagarri bikaina. Negua, udaberriaren lehioa…

domingo, 20 de noviembre de 2011

Transmedia: Panzer Chocolate

Transmedia kontzeptua ez da berria, baina gaur egun, teknologia berriak eta web 2.0 esker, gero eta nabarmenagoa da beronen eragina. Transmedia, hau da, eduki berbera euskarri eta medio ezberdinen bitartez (mugikorrak, webguneak, jokoak, zinea…) hedatzea, beti ere, euskarri edo medio bakoitzari dagozkion teknika eta mintzairak errespetatuz.

Panzer Chocolate, espainiar estatuan lehenbiziz egin den transmedia luzemetraia dugu. Audientzia entretenitzeko formatu berriak bereiz daitezke proiektuaren baitan, erabiltzaileek, kontatzen den istorioan partehartze zuzena izan dezaten.

Izan ere,gaur egun, eduki baten inguruan remix eta nahasketa etengabeak egitea inoiz baino errazagoa da, baita ere berau sarean hedatu eta zabaltzea. Iraultza digital honen ondorioz, hartzailea, parte hartzaile, sortzaile eta zabaltzaile ere bihurtu da.

Transmedia kanpaina zuzen batek, ikusle zein kontsumitzaileak marka edota proiektu batekin identikatzea errazten du. Ondorioz, erabiltzaile partehartzaile hauek markaren preskiptore bikainak bihurtzen dira.

Nazien sekreturik ezkutuena… argitzear dago!

viernes, 18 de noviembre de 2011

QR Kodeak: marketin tresna berria



Telefono mugikorrak jasaten ari diren etengabeko hobekuntza eta aurrerapen teknologiokoei esker, marka zein kontsumitzaileek datuak jaso edo bereganatzeko gero eta sistema gehiago dituzte. Besteak beste, azkenaldi honetan ezagunak egin diren QR (Quick Response) kodeak.
QR kodeek hiru karratu dituzte izkinetan, irakurleari kodearen posizioa antzematea ahalbidetzeko.Teknologia horren arrakastaren arrazoia bere estandar irekia eta sakeleko telefonoei lotutako erabilera dira; sakeleko telefonoek irakurgailu gisa funtziona dezaketelako. Askotariko informazioa bildu dezakete: testu sinpletik hasita, bisita-txartel elektroniko eta web-orrietarako loturetaraino.

Kode bidimentsional hauek, merkadoteknia eta marketinerako tresna oso garrantzitsuak bihurtu dira. Izan ere, QR kode hauek sortzea oso erraza izateaz gain, aparailu mugikorrekin behin irakurrita, informazio kopuru oso interesgarria jasotzeko aukera ematen baitu.

Gaur egun berauen erabilera ez da produktu edo gune zehatzetara mugatzen. Zenbaiten talentu eta berrikuntzei esker, kontsumitzaileok imaginatzerik ez dugun hainbat euskarritan aurki ditzazkegu QR kode berri hauek. Izatez, kontsumitzaileek beren Smartphonei esker kode horiek irakurtzeko duten erraztasunari dela-ta, hainbat eta hainbat enpresa QR kodeak erabiltzen hasi dira. Mobio-ren datuen arabera, azken urtean %1200 gorakada izan dute.

Zeri erantzuten dio arrakasta honek? QR kodeak sortu eta aplikazioa oso sinplea delako, eta ia-ia doanekoa. Horrez gain, berauen bitartez publizitate eta marketin kanpainak kudeatzea oso erraza da.

Beraz, kaletik ibiltzerakoan adi ibili eta zergatik ez… parte hartu!



miércoles, 16 de noviembre de 2011

Spotify jadanik Windows Phone 7-n


Dagoeneko kalean da Spotify aplikazioa Windows Phone erabiltzaileentzat. Mugikorrentzako egokitutako sistema eragile askok bezala, iOS, Android. Symbian eta Palm, duela egun batzuk Microsoft-ek bere blog ofizialean adierazi duenez, Windows Phonek ere Spotify erabil ahal izateko aplikazio berri bat abian jarri du. Spotify, streaming bidez musika erreproduzitzen duen plataforma, musika edonon eta uneoro entzuteko tresnarik ezagun eta egokiena dugu. Izatez, musika edo abestiak entzun ahal izateko, ez da beharrezkoa artxiboak deskargatzea.

Windows Phone-ra egokitutako aplikazio honek, ordainpean izaten dituen aukera berberak izango ditu, besteak beste, Internet konexiorik gabe musika zerrenden eskuragarritasuna, abesti zerrendak osatu ahal izatea edota, online dauden lagunen musika erreproduzitzeko aukera. Horrez gain, Wi-Fi edo 2.5/3G erabiliz, abestiak erreproduzitzea posible izango da, eta ordenagailu eta mugikorraren arteko sinkronizazioari esker, musika edono entzun izan ahalko dute erabiltzaileek.

Spotify aplikazioari ahalik eta etekin handiena ateratzeko, interesatutako erabiltzaileek ordaindu beharreko Premium kontu bat sortu beharko dute. Nahi izanez gero, aukera ezin hobea dugu, goazen lekura goazela, musika gurekin eramateko.